PAVA é o título do primeiro proxecto musical en solitario de Lucía Aldao.
Atoparás os cinco temas incluídos en PAVA aloxados en todas as plataformas, pero só a través de “enlace bandcamp” podes acceder á súa descarga e a unha das 100 esculturas que a artista Laura Pazos elaborou en exclusiva para o proxecto.
Lucía Aldao é unha poeta coruñesa nacida en 1982. Leva máis de 20 anos dedicándose de xeito profesional ao mundo da poesía escénica, da música e do humor.
En 2005 xúntase coa tamén poeta María Lado, e a día de hoxe continúan ofrecendo os seus
espectáculos nos escenarios máis variados do país e fóra das fronteiras deste. Xuntas son aldaolado, o irreverente dúo poético que mestura a poesía co humor e a música nun exercicio de comunicación directa co espectador.
A composición desta canción foi inspirada pola apertura do faro de Oza á cidadanía coruñesa en 2018. Este verán regresamos á zona das Xubias para gravar a versión en directo que podedes escoitar neste vídeo.
A do aire musculado foi a primeira canción que compuxen na miña vida. Que compuxen para min, quero dicir, non de encarga e sen saber moi ben de onde saía nin onde ía acabar. Por iso abre o disco. Estiven facendo memoria e recordei que só a cantei en público nunha ocasión, na Capitol en 2016, nunha gala dirixida por Mercedes Peón dentro do proxecto “Compostela, territorio das mulleres”. Recordei tamén que os días previos a compoñela escoitaba en bucle e conmovida “En las copas de los árboles”, de Fran Gayo.
A sesión en directo que ides escoitar gravouna Diego Delgado en Berlín en 2017 e está espidiña de todo, só lixeiramente acompañada pola guitarra, coa voz como protagonista, antes de vestila coa roupa bonita que leva finalmente no disco.
PAVA é un proxecto musical expansivo que prescinde do soporte físico habitual e a cambio ofrece un obxecto escultórico elaborado pola artista Laura Pazos. Trátase dunha edición limitada (só 100!) que conecta a peza artística co traballo musical. A pava -que é tamén o termo coloquial para referirnos a unha moza- representa esa porcentaxe de cigarro encetado que se comparte, e está elaborada en resina de poliuretano policromada e vernizada. Ten unhas medidas de 11 x 2,5 cm e érguese sobre unha base de madeira de 8 cm de diámetro. Coa súa adquisición a través de bandcamp recibirás un código de descarga para poder levar contigo as 5 cancións de PAVA.
PAVA conta coa produción musical, imaxe e vídeo de Diego Delgado.
Co patrocinio do Concello da Coruña